HALI YA BARABARA YA MIRADI MIKUBWA KUSINI MWA TANZANIA YARIDHISHA.

Namtumbo -Tunduru hii ni Sehemu ya barabara ya lami  iliyo kamilika.

Daraja la Lumesule likiwa katika hatua ya ujenzi katika barabara ya Mangaka – Lumesule –           Nakapanya (70.5km)

Wakala wa Barabra Tanzania (TANROADS) yenye jukumu la kuratibu na kusimamia matengenezo, ukarabati na ujenzi wa barabara kwenye mtandao wenye urefu wa jumla ya kilometa   34,333. Kati ya hizo  kilomita 12,203 ni barabara kuu na kilomita 22,130 ni barabara za  mkoa.

TANROADS imefanikiwa kwa kiwango kikubwa katika ujenzi wa barabara na madaraja nchini kote, Tukimulika ukanda wa kusini wa Tanzania yaani Mtwara –  Masasi – Tunduru – Songea – Mbamba Bay (km 860 hadi Lilongwe nchini Malawi km 1263), barabara hupitika vizuri na sehemu chache ambazo ziko katika hatua za awali za ujenzi hupitika kwa taabu wakati wa masika.

Miradi mikubwa ya barabara na madaraja inayoendelea kutekelezwa ukanda wa maendeleo wa Mtwara (Mtwara Development Corridor) ni Mangaka – Lumsule – Nakapanya (70.5km), Tunduru – Matemanga (58.7 km) na Kilimasera – Namtumbo (60.7 km).

Barabara hizi zilizo katika hatua nzuri ya utekelezaji wa ujenzi ni muhimu kwenye ukanda wa maendeleo wa kusini na inatarajia kuwa barabara ya kimataifa (international route) itakayounganisha nchi za Tanzania, Malawi, Zambia na Msumbiji kupitia daraja la Umoja (Unity Bridge) punde ujenzi unaendelea wa barabara ya Mangaka – Mtambaswala (65.5 km) utakapo kamilika.

Dhumuni kubwa la miradi hii ni kuendeleza sehemu ya kusini yenye utajiri wa mazao ya kilimo, madini na utalii ambazo ni muhimu kwa maendeleo. Kama ilivyo kwa mikoa ya kusini zao kuu katika eneo la mradi ni korosho.

Ujenzi wa Barabara  ya ukanda huu kwa kiwango cha lami utakapokamilika muda wa safari utapungua, idadi ya magari yanayotumia barabara itaongezeka na usalama wa watumiaji wa barabara utaboreka na hivyo gharama za usafiri  na usafirishaji zitapungua.

Pia kuboreshwa kwa hali ya usafirishaji kutaanza na kuchochea shughuli za kijamii na kiuchumi kati ya mikoa ya Lindi na Mtwara na nchi ya Msumbiji na pia nchi za ukanda wote wa Maendeleo wa Mtwara (Mtwara Development Corridor).