MSAIDIZI WA ASKOFU WA DAYOSISI YA MASHARIKI NA PWANI KANISA LA KIINJILI LA KILUTHERI TANZANIA (KKKT) MCHUNGAJI CHEDIEL LUIZA APONGEZA SERIKALI YA AWAMU YA TANO KWA KUTATUA CHANGAMOTO KWA JAMII.

SERIKALI ya awamu ya Tano inayoongozwa na Dkt. John Pombe Magufuli imepongezwa kwa juhudi inazochukua katika kutatua changamoto mbalimbali zinazowakabili wananchi.

Kauli hiyo imetolewa leo Jijini Dar es salaam na Msaidizi wa Askofu wa Dayosisi ya Mashariki na Pwani ya Kanisa la Kiinjili la Kilutheri Tanzania (KKKT) Mchungaji Chediel Luiza wakati wa Ibada ya  kuaga mwili wa Spika Mstaafu Marehemu Mhe. Samweli Sitta.

“Viongozi wetu wa sasa wametambua kuwa jamii yetu inakabiliwa na changamoto mbalimbali na wameanza kuchukua hatua za makusudi” alisisitiza mchungaji Luiza.

Akifafanua zaidi Mchungaji Luiza amesema ni muhimu kwa kila mtu kutumia nafasi yake kuwatumikia wananchi kwa uadilifu na kwa maslahi mapana ya Taifa kama alivyofanya Marehemu Samweli Sitta.

“Hatua yakuwatumikia wananchi wa uadilifu na uzalendo ilimjengea heshima kubwa Mhe. Samweli Sitta katika kipindi chote cha uhai wake” alisema Mchngaji Luiza.

Kwa upande wake msemaji wa Chama Cha Mapinduzi (CCM) Christopher Ole Sendeka amesema kuwa Marehemu alifanikisha mabadiliko makubwa katika Bunge la 9 akiwa Spika ikiwemo kuanzishwa kwa Mfuko wa jimbo ili kuchochea maendeleo katika majimbo yote hapa nchini.

“Alipambana kupiga vita rushwa na vitendo vyote vya ufisadi katika kipindi chote cha uhai wake kwa maslahi mapana ya wananchi wa Tanzania”alisisitiza Olesendeka.

Aidha ameongeza kuwa Marehemu Sitta alichangia kuinua hadhi ya Kituo cha uwekezaji Tanzania (TIC) na kuwa moja ya vituo bora vya uwekezaji Barani Afrika.