AMREF YAFANIKIWA KUWANUSERU WASICHANA 160 KUFANYIWA MILA POTOFU.

ZAIDI ya wasichana 160 wa jamii ya wafugaji  wa kabila la Kimasai wamenusurika kufanyiwa mila ya ukeketaji na badala yake wamefanyiwa tohara mbadala .

Wasichana  hao waishio katika kata ya Kang'ata iliyoko wilayani Handeni  wameweza kunusurika kufanyiwa mila hiyo kufuatia elimu waliyoipata kupitia  mradi wa Kijana wa leo unatekelezwa na shirika la Amref 

Akizungumza  wakati wa sherehe za kuvuka rika kwa jamii hiyo meneja mradi huo Dar Aisha Byanaku alisema kuwa kufuatia elimu kuhusu madhara ya ukeketaji  waliyotoa katika eneo hilo wamefanikiwa kuwa komboa wasichana  hao. 

"Lengo la mradi kuhakikisha tunawakomboa wasichana wa jamii ya wafugaji  na wanaishi pembezoni kuachana na mila potofu ambazo zina madhara  kwa walengwa"alisema Dkt Byanaku. 

Alisema kuwa mradi huo unatekelezwa kwa kipindi cha miaka  mitatu katika wilaya hiyo umelenga kuwa komboa wasichana  500,lakini kwa mwaka mmoja pekee wameweza kufanikiwa kuokoka wasichana 170 kufanyiwa vitendo vya ukeketaji. 

Hata hivyo Kaimu mkurugenzi wa Halmashauri  ya wilaya  ya Handeni Noeli Abel alisema mimba za utotoni pamoja na ukosefu wa taarifa sahihi za elimu ya ujinsia kwa vijana ni sehemu ya changamoto  kubwa zinazowakabili  vijana wa kitanzania  kwa sasa. 

Alisema changamoto  hizo zinachangia kwa kiasi kikubwa kusababisha vijana  wengi kushindwa kufikia malengo ya kimaendeleo  waliyojiwekea kwa wakati ,na wengine  huishia kukatiza ndoto hizo.