ASKARI JWTZ AFIKISHWA MAHAKAMANI KWA KOSA LA KUUWA.

ASKARI mmoja wa Jeshi la Wananchi Tanga (JWTZ) MT .69500 s/sgt John Komba pamoja na wakazi wengine watatu wa jijini Tanga wamefikishwa katika Mahakama ya Hakimu Mkazi Tanga kwa kosa la kusababisha kifo cha aliyekuwa kondakta wa daladala inayosafiri kati ya Nguvumali na Raskazoni, Salim Kassimu (18) mkazi wa Mwamboni.

Akisoma shitaka la mauaji linalowakabili watuhumiwa hao na Wakili wa Serikali, Donata Kazungu mbele ya Hakimu Mkazi  Mfawidhi, Hilda Lyatuu alisema mnamo Januari 26 mwaka huu katika kambi ya JWTZ iliyoko kata ya Nguvumali jijini Tanga mshtakiwa Komba pamoja na wenzake watatu walimuua Salim Kassim katika eneo la kambi hiyo.

Wakili Kazungu aliwataja washtakiwa wengine katika kesi hiyo ni Adamu Juma (20), Sofia John (20) ambao ni mwanafunzi, Yohana Warioba na Bernard Nicholaus ambao ni wanamgambo wanaolinda katika kambi hiyo.

Hata hivyo, watuhumiwa hao hawakutakiwa kujibu chochote kutoka na mahakama hiyo kutokuwa na mamlaka ya kusikiliza kesi za mauaji.

Upelelezi kuhusu kesi hiyo haujakamilika na hivyo itatajwa tena Februari 26 mwaka huu.